Home

Barre Hiiraale oo Kismaayo Saaka Gaadhay

Xogta Shacabka (Kismaayo) Kornayl Barre Aadan Shire (Bare-Hiiraale) iyo ciidan uu wato ayaa saaka soo galay magaalada Kismaayo oo u ka socdo shir maamul-goboleed loogu samaynayo gobollada Jubooyinka iyo Gado. Imaatinka Barre Hiiraale ee Kismaayo ayaa dhalisay xiisad maadaama aan wali lagu heshiinin maamul-u samayntii Jubooyinka.

Bare Hiiraale ayaa yimid maalin un kadib markii ay Kismaayo gaadheen ciidn lixdameeyo ah oo ka soo kicitimay gobolka Gado. Ciidanka shalay yimid ayaa ku biiray ciidan ree Gado ah oo horay u daganaa Warshada Hilibka.

Xaalada amni ee Kismaayo ayaa cirka isku shareertay maadaama dhaq- dhaqaaqa ciidan ee ree Gado loo arkay is abaabul lagu carqaladaynayo shirka halkaasi ka socda.

This email address is being protected from spambots. You need JavaScript enabled to view it.

Maxaa Laga Wadaa Video-ga Cakaranews La Soo Galiyay?

Xogta Shacabka (Addis Ababa) Intiinii la socotay maalmahan, waxaa ay maamulka kililku sheegteen inay khaarajiyeen saraakiil ka tirsan ONLF ayna gacanta ku dhigeen ilaaladii Muxumed Anni dagaal ka dhacay aaga Farmadow. Hadaba waxay websiteka Cakaara soo galiyeen cajalad muuqaal ah oo ay ka dhigayaan cadayntii dagaalkaas ay sheegeen inay ONLF jab ugu gaysteen.

Cajaladaas oo qiyaasti soconaysa 18 daqiiqadood ayaa waxaa ka hadlaya xubno kasoo xarooday ONLF oo markay laba kalmadood sheegaanba la dhex galinayo ilma yar oo qoslaya iyo nin telefon ku hadlaya oo odhanaya “Qoryooloy ayaan joogaa; warta agteeda” arrintaasi oo dadkii daawaday ay la yaabeen waxa ay kililku ka wadaan.

Sidii ay hada ka hor sheegteen, kililku waxaa laga filayey inay soo bandhigaan qoryihii dhashiikayaalka ahaa ee ay sheegeen inay ka qabsadeen ONLF iyo maxaabiistii ay soo qabteen.

Dhanka ONLF ayaa iyaguna sidii caadada u ahayd soo qora warar sheegaya dagaalo ay ku qaadeen ciidanka Ethiopia oo askar kaga laayeen, taasoo haday run tahay ay waa hore wadanka xorayn lahaayeen, balse ay taageerayaalkooda ku maaweeliyaan.

This email address is being protected from spambots. You need JavaScript enabled to view it.

Sheekh Deeq oo Waraysi Siiyay Ilays TV

Xogta Shacabka (Asmara) Hogaanka Ciidanka ONLF Deeq Maxamed Aw-Muxumad (Sheekh Deeq) ayaa waraysi uu dhawaan siiyay barnaamujka ILAYS kaga waramay xaalada nololeed ee shacabka Ogaadeeniya isagoo sheegay inay dadka ku nool miyigu nolol dhaamaan kuwa magaalooyinka dagan.

Sheekh Deeq ayaa dadka magaalooyinka ku nool ku tilmaamay inay ku jiraan go’doon ayna yihiin dad “cadawga la fal-galay”. Mar uu ka hadlayey dhanka ganacsiga ayuu sheegay inuu aad u hooseeyo ganacsigu, maadaama aysan jirin wax wadooyin ah oo dhulka laga sameeyay, isla mar ahaantaana ay xuduuduhu xidhanyihiin. Qofkii waraysigan daawada ayaa is waydiinaya Sheekh Deeq ma wuxuu ka waramayaa shirkado ganacsi oy jabhadu leedahay mise jabhada ayuu u qaabilsanyahey arrimaha ganacsiga.

Sheekh Deeq oo ka warbixinaya xaalada xoolaha shacabka Ogaadeeniya dhaqdo, ayaa sheegay in geela iyo adhigu ay sidoodii ugu badanyihiin Ogaadeeniya, balse ay fardaha iyo lo’du aad u yaraadeen.

Inkastoo Sheekh Deeq yahay madaxa ciidanka jabhada oo laga filayay inuu ka waramo dagaallada ay ciidankiisu ku qaadeen kuwa Ethiopia iyo haday jirto goobo ay ka qabsadeen, ayuusan haba yaraatee carabka ku dhufanin wax dagaal ah oo dhex maray ONLF iyo ciidanka Ethiopia.Dhanka dawlada iyo xabsiyada ayuu Sheekh Deeq sheegay inaysan wax dhibaato ah ka jirin oo ay caadi tahay in dawladi xabsi yeelato.

Waraysiga Sheekh Deeq ayaa u muuqday mid loogu jawaabayo hadalo waa dhawayd saxaafada soo galay oo sheegayay in ay Liyuu Boolisku dileen, sidaasi darteedna inuu noolyahay la cadaynayo.

This email address is being protected from spambots. You need JavaScript enabled to view it.

Xuseen Cabdi Xalane oo Jigjiga Jooga

Xogta Shacabka (Jigjiga) Wasiirkii hore ee Maaliyada Soomaaliya Xuseen Cabdi Xalane ayaa magaalada Jigjiga soo gaadhay. Xalane oo siday ay noo sheegeen dad la kulmay gadh wadeen u ahaa wafdi odayaal oo ka socda gobollada koonfurta Soomaaliya, gaar ahaan Gado iyo Jubooyinka ayaa Jigjiga u yimid martiqaad ay ka heleen xukuumada kililka oo baryahan faraha kula jirta arrimaha Jubooyinka.

 Inkastoo aanan wali maqlin kulan dhex maray Xalane iyo xukuumada kililka, hadana waxaa dhawrkan bari ay joogeen soo dhaweeyay qaar kamid ah wasiirada kililka, sida ay noo sheegeen xubno kamid ah wafdiga.

Dhanka kale, Ilo lagu kalsoonyahey oo ay Xalane sheekaysteen ayaa Xogta Shacabka soo gaadhsiiyay inuu Xalane damacsanyahey siduu xurgufta uga dhex saari lahaa Madaxweynaha kililka Cabdi Iley iyo Wasiirkii hore ee Cilmi-baadhista, Axmad Sheekh.

Xuseen Cabdi Xalane oo ka hor intuusan dhex galin siyaasada Soomaaliya wakiil uga ahaan jiray hayada Save The Childern wadanka Ethiopia ayaa horay u iman jiray Jigjiga iyo kililka 5aad isagoo qoray buug suugaameed wakhtiyaduu ku sugnaa Ethiopia.

This email address is being protected from spambots. You need JavaScript enabled to view it.

Siilaanyo oy Da'dii Ka Daba-timid; Xasuusan Waayay Wasiiradi Xukuumadiisa

Xogta Shacabka (Washington) Madaxweynaha Jamhuuriyada la magac baxday Somaliland Axmad Siilaanyo, ayaa isagoo shir jaraa’id haya xasuusan waayay inta wasiir ee xukuumadiisa dumar ka ah. Siilaanyo oo jawaab ka bixinayey kaalinta dumarku ku leeyihiin Somaliland, ayaa Wasiirkiisa Arrimaha Dibada waydiiyay tirada wasiirada dumarka ah isagoo la duubayo.

Halkan Ka Daawo Fadeexada Siilaanyo Qabsatey

This email address is being protected from spambots. You need JavaScript enabled to view it.

Sadexda M/weyne Ku Xigeen & Saddexdii Hore Xagay Isaga Egyihiin?

Xogta Shacabka Saddexda M/weyne ku xigeen ee kililka oo ay hada u dhamaatay hal sano intii ay badaleen saddexdii ka horraysey, ayaad moodaa inay meelo badan isaga egyihiin raga is-badalay. Xogta Shacabka ayaa hadaba si kooban isu bar bar dhigtay nin waliba ninkuu badalay iyo halkay isaga egyihiin.

1.      C/fataax Maxamuud Xasan & Dr. Suldaan Wali

Labadooduba, waxay ka soo jeedaan gobolka Nogob, iyo xubin ka tirsan guddiga fulinta. Waxay kaloo wadaagaan inay isku beel ka soo jeedaan Madaxweynaha Kililka, sidaasi darteedna miciyaha loogu hor siibaay.

 2.      C/Xakiin Cigaal & Aadan Faarax

Labaduba waxay ka soo jeedaan gobolka Siti,iyo xubin guddiga fulinta xisibiga. Waxay labadooduba yihiin niman qunyar socod ah oo aan aad u dhex galin siyaasiyiinta kale ee kililka. Waxayna wasiirko ka noqdeen Xafiiska Hawlaha Guud. Labaduba waxay xaasaskoodu daganyihiin Diridhabe.

 3.      C/laahi Ethiopia & Axmad Qabyo

Labadooduba waxay kamid yihiin golaha xildhibaanada kililka iyo xubin guddiga fulinta, waxayna samaysteen dagmooyin cusub; Araarso iyo Tulli-Guuleed. Waxaa labadaba lagu xantaa  inay xooga saaraan dhanka ganacsiga iyo qandaraasyada.

Waxaan shaki ku jirin inay siyaasiyiintani ku kala duwanyihiin dabeecado iyo tilmaamo badan oo kale, balse aan ka soo qaadannay meelaha ay iska shabahaan oo kaliya.

This email address is being protected from spambots. You need JavaScript enabled to view it.

Maxamud Heeryo oo Ka Badbaaday Shil Baabuur

Xogta Shacabka (Jigjiga) Wasiirkii hore ee Xafiiska Ka Hortaga iyo Xakamaynta AIDS-ka Maxamuud Heeryo, ayaa ka bad baaday shil baabuur oo gabi ahaanba baabuurkiisii cardaadiqada ka dhigay. Maxamuud oo ka tagay Diridhabe kuna sii jeeday Jigjiga, ayaa isagoo maraya Baabili gaadhigu wadada kala baxay isna gadiyay dhawr jeer.

Dad uu u waramay Maxamuud ayuu u sheegay inaysan isaga waxba soo gaadhin maadaama uu suunka xidhnaa. Gaadhiga uu shilka ku galay Heeryo ayaa ahaa Suzuki midabkeedu casaan yahay, sida ay noo sheegeen dad wadada ku maray.

Maxamuud Heeryo ayaa kamid ahaa masuuliyiinti ay Xogta Shacabku todobaadkii hore qortay inay Diridhabe u joogeen muraadyo kala duwan, wuxuuna shilka galay kadib markuu kasoo laabtay halkaasi.

Shilalka baabuurta yar yar ayaa aad ugu badan jidadka kililka 5aad iyadoo ay ugu wacantahay darawaliinta oo inta badan xawaare sare gawaadhiga ku erya.

This email address is being protected from spambots. You need JavaScript enabled to view it.                                     

Ree Isahaaq oo Cabdi Iley Dacwad Ku Kuusay

Xogta Shacabka (Addis Ababa) Beesha Ree Isahaaq ayaa dacwad ay si wadajir ah ugu saxiixanyihiin siyaasiyiin, ganacsato iyo qurbajoogba oy kaga cabanayaan Madaxweynaha Kililka Cabdi Maxamud Cumar (Cabdi Iley) u qoray dawlada dhexe ee Ethiopia. Nuqul dacwadaasi ah oo hada soo gaadhay Xogta Shacabka ayaan ka fiirsanaynaa inaan soo galino warqadaasi gabi ahaanteedba iyo inaan qoraal ahaan ku soo koobno ujeedada ku qoran, maadaama aan ka baqayno inay dhib ku keento magacyada ku saxiixan dacwadaasi.

Si kastaba ha ahaatee, waxaan saacadaha so socda go’aan ka gaadhi doonaa arrintaas oo marka aan soo galino ay akhristayaashu si dhab ah u fahmi doonaan waxa ay salka ku hayso colaada siyaasadeed ee u dhaxaysa Ree Isahaaq iyo Madaxweyna kililka Cabdi Iley.

Waxaan u mahad celinaynaa akhristaha xogtan muhiimka ah islamarkaana xasaasiga  ah na soo gaadhsiiyay.

This email address is being protected from spambots. You need JavaScript enabled to view it.

John Kerry oo Ethiopia Booqanaya 19-ka Bisha May

Xoga Shacabka (Washington) Wasiirka  Arimaha Dibadda Mareykanka ayaa sheegay inuu ka qaybgali doono xuska sanadguurada Midowga Afrika oo lagu qabanayo Xarunta MA ee Adisababa. Dawladda Mareykanka ayaa doonaysa inay dib ugu soo laabato Afrika oo sanadihii la soo dhaafay ay ka sii jeeday taasoo dhalisay in dalalka ay ka midka yihiin Shiinaha iyo Iran ay lugaha la galaan. Socdaalka  John Kerry ayaa lagu tilmaamay inay arimahaa ka dambeeyaan.

Kerry oo u waramaya Aqalka Senatka ayuu sheegay inuu ka walaacsan yahay Shiinaha oo xidhiidhkii uu ku lahaa Afrika ay sii kordhayso iyo socdaalkii uu dhawaan saddex dal oo Afrika ah uu M/Weynaha Iran Axmad Najaad ku soo maray taasoo uu ku tilmaamay inay tahay dhibaato cusub oo soo korodhay. Mr. Kerry isagoo u waramaya Aqalka Odayaasha ee Senate-ka wuxuu yidhi;; ” Shiinaha ayaa dhaafay  Mareykanka xagga maal-gashiga Afrika hadda”.

Wuxuu Mareykanka ka walwal qabaa habka ay dawladaha ay ka midka yihiin Shiinaha iyo Iran adeegsanayaan markay la tacaamulayaan Afrika, taasoo uu ku tilmaamay Xoghayaha Arimaha Dibadda ee Mareykanka inay tahay arin aan haboonayn. Isagoo aan dalna magacaabin ayuu John Kerry  sheegay inay jiraan dawlado bixiya laaluush ay siiyaan madaxda Afrika, taasoo ka soo horjeeda qaanuunka tartanka baayac-mushtarka.

Midowga Afrika (AU) oo waagii hore la odhan jiray Ururka Midowga Afrika (OAU) ayaa 19-ka ilaa27-ka bisha May loo dabaaldagayaa 50-guuradii asaaskii ururkaa.

This email address is being protected from spambots. You need JavaScript enabled to view it.

Kornayl Doolaal & Duuliye Asli oo Dhagaxbuur Tagay

Xogta Shacabka (Dhagaxbuur) Magaalada Dhagaxbuur, waxaa shalay gaadhay Kornayl Doolaal Aadan-dhagoole iyo Duuliye Sare Asli Xasan Cabaade oo kamid ah qurbajoogta, horayna uga mid ahaa saraakiishii ciidankii dawlada Soomaaliya. Inkastoo Doolaal hada kahor dhawr jeer booqday Dhagaxbuur, waxaa hada safarkan lagu galbiyay Duuliye Sare Asli oo iyadu aan wadankan cagta dhigin waligeed, balse diyaarado miig ah ku dul mari jirtay wakhtiyadii ay socdeen dagaaladii Soomaaliya iyo Ethiopia.

Sida uu noo sheegay mid kamid ah qurbajoogta safarkaasi Dhagaxbuur u sii raacday oonu telefon kula xidhiidhnay, waxaa la socday wasiiro dhawr ah oo u horkacayo Khadar Dheere oo shalay iyo maanta shirar ku qabtay magaalada Dhagaxbuur.

Dadka ka imanaya qurbaha ee wakhtiga badan ka maqnaa dalka ayaa baryahan danbe aad u soo badanaya, iyadoo sidoo kalena ay yaraatay amni xumadii ka jirtay meelo badan oo kamid ah Kililka 5aad.

This email address is being protected from spambots. You need JavaScript enabled to view it.

Waayaha Cusub oo Bandhig Faneed Ku Qabtay Muqdisho

Xogta Shacabka (Muqdisho) Magaalada Muqdisho ayaa waxaa ruxay oo dadku aad ula dhaceen bandhig faneed ay habeen hore halkaasi ku qabteen kooxda Waayaha Cusub ee fadhigoodu yahay wadanka Kenya. Kooxdan oo barnaamujyo ka sameeya magaalooyinka ay Soomaalidu dagto ee Geeska Afrika, ayaa mudo laga joogo sannad iyo badh booqday oo bandhigyo ku soo qabtay wadanka Ethiopia magaalada Jigjiga.

Halka Ka Daawo Bandhigii Waayaha Cusub ee Muqdisho

This email address is being protected from spambots. You need JavaScript enabled to view it.  

Khilaafka Musharixiinta Absame oo Cirka Isku Shareeray

Xogta Shacabka (Kismaayo) Iyadoo maalmihii ugu danbeeyay uu jiray khilaaf xoogan oo ka dhex dhashay Musharaxiinta Madaxwaynaha Jubbaland State ugu sharaxan Beesha Absame oo kamid ah Beelaha daga Jubbooyinka, ayaa waxaa arintaasi ka hadlay Afhayeenka Maamulka KMG ah ee Magaalada Kismaayo ahna madaxa arimaha Bulshada Maamulkaasi C/naasir Seeraar Maax, wuxuna sheegay beeshu inay isku af-garatay Axmed Madoobe inuu noqdo qofka ugu sharaxan madaxwaynaha.

Seeraar ayaa sheegay in marka hadda la eego marxaladda lagu jiro uu Axmed Madoobe yahay ninka ku haboon ee musharaxa doorashada madaxweynaha, wuxuuna ku gacan seyray diidmadii ka soo yeertay odayaal iyo qaar kamid ah musharixiinta beesha ka soo jeeda.

Sheekh Maxamed Ibrahim Shakuul oo kamid ah Musharaxiinta Beesha ayaa u sheegay Warbaahinta  mar sii horaysay go’aanka odayasha Absame ay ku gaadheen Musharax Axmed Madoobe inuu noqdo qofka beesha Matalaya lagasoo abaabulay Xarunta Axmed Madoobe.

Warar kale oo Xogta Shacabka heshayna waxay sheegayaan in faragalin wayni kaga socoto dhanka kililka 5aad oo iyagu xooga saaraya in Axmad Madoobe uu noqdo Madaxweynaha Jubaland State.

This email address is being protected from spambots. You need JavaScript enabled to view it.

Shaqaalaha Xafiiska Dakhliga oo Baadi-Goobaya Ku Xigeenkoodi Yasin Cumar

Xogta Shacabka (Jigjiga) Shaqaalaha Xafiiska Dakhliga ee kililka ayaa ku wareersan Wasiir Ku xigeenka Xafiiska Yaasiin Cumar oo ay garan la’yihiin meel uu jaan iyo cidhib dhigay. Xog email uu nagu soo gaadhsiiyay mid kamid ah shaqaalaha Xafiiska Dakhliga oo naga codsaday inaan magiciisa qarino, ayaa ku waramaysa in tan iyo intii xafiiska lagu soo magacaabay wasiirka cusub, Cumar Siyaad, uusan Yaasiin usoo shaqo galin sidii hore.

Isla xogtaasi uu noo soo diray sargaalka sare ee Xafiiska Dakhliga ka shaqeeya ayuu ku sheegay in Wasiir ku xigeenka inta badan gaadhigiisu taaganyahey Xafiiska Hawlaha Guud, taasoo ay macaamiishii iyo shaqaalihii Xafiiska Dakhligu kala garan la’yihiin inuu Yaasiin yahey Wasiir Ku xigeenka Hawlaha Guud iyo inuu yahey ku xigeenka Dakhliga.

Xafiiska Hawlaha Guud ayaa waxaa dhawaan loo magacaabay M/weyne ku xigeenka C/Xakiin Cigaal oo horay wasiir uga ahaa Xafiiska Dakhliga, Yaasiina ay aad isugu dhawaayeen. Qaar kamid ah shaqaalaha Xafiiska Dakhliga oy asxaab yihiin Yaasiin ayaa Xogta Shacabka u sheegay inuu Yaasiin rajaynayey in isaga laga dhigo Wasiirka Dakhliga, sidaasi darteedna uu mooraalkiisu hoos u dhacay maadaama an laga dhigin.

Inkastoo ay shaqaalaha Xafiiska Dakhligu aad u soo dhaweeyeen Wasiirka cusub Cumar Siyaad ayna ku tilmaameen shaqsi aad u fur furan oo dabeecad wanaagsan, hadana waxaad moodaa in wasiirkii hore ee Xafiiska C/Xakiin Cigaal uusan xilkuu wareejiyay ugu darin Wasiir ku xigeenka Yaasiin.

This email address is being protected from spambots. You need JavaScript enabled to view it.

Musharax Shekh Shakuul oo Kaalmo Gaadhsiiyay Ardayda Agoonta Kismaayo

Xogta Shacabka (Kismaayo) Musharax Sheekh Shukul Oo ka Mida Musharaxinta U tagan xilka Madaxweynaha mamaulka Jubaland Ayaa Deeq Buugag Iyo Qalimanta Wax lagu barto waxa Uu U Qeybiyey Ardayda Wax ka Barta Dugsiga Agoomaha Magaalada Kismaayo Ee xarunta Gobolka Jubada Hoose.

Sheekh Shukul Ayaa Halkaasi waxa Uu kala hadlay Ardayda Isagoona Ku Booriyey Inay wax barashada Xoga Saraan isagoona Sheegay Inay Fursad U heleen wax Barasho.

Musharax Shukul Ayaa Sheegay Inuu Hadii Xilka Madaxweynaha Maamulka Jubaland Ku Guulaysto Dhiiri galinayo Sida Dhalin yarada wax barashada Uga Horumari lahayeen.

Halkan Ka Daawo Video Muujinaya Deeqada Sheekh Shakuul

This email address is being protected from spambots. You need JavaScript enabled to view it.

 

ESTV oon Kiradii Laga Bixinin Darteed Hawada Uga Maqan

Xogta Shacabka (Jigjiga) Telefishinkii kililka ee ESTV ayaa maalintii shanaad hawada ka maqan, maadaama ay xukuumadu bixin waydey kiradii Satalaytka. Ilo lagu kalsoonyahey oo katirsan shaqaalaha warbaahinta kililka ayaa nooo sheegay inaysan waxba ka jirin arrinta Cakaaranews lagu qoray ee ah in loo “guurayo studio cusub” lana dhaafayba 48-dii saac ee ay qabsadeen inay hawada ku soo laaban doonaan.

Ilo lagu kalsoonyahey sida aan ka ogaannay, waxaa la bixin waayay kiradii  shirkadaha Satalytka iska leh la siin jiray, taasoo ay hawada ka saareen inta ay gaadhayso lacagta oo sida naloo sheegay loo diray. Wasiirka Warfaafinta Kililka Maxamed Guure oo shaqo ugu maqnaa Qabridahare, ayaa si dag dag ah Jigjiga ku soo galay si uu ESTV hawada ugu soo celiyo.

ESTV ayaa hada kahor laga saaray Arabsat loona wareejiyay Hot-bird iyo Thaicom, waxaana kharashkiisa laga bixiyaa miisaaniyada kililka. Sida ay ilaha aan warkan ka helnay noo sheegeen maamulka kililka iyo Satalaytka shirkada laga kireeyay, waxaa u dhexeeya Engineer Axmad Abukar oo ah mulkiilaha Universal TV, oo dhinaca farsamada ka caawiya ESTV.

Hadaba sida ay Xogta Shacabku ogaatay, Engineer Axmad ayaa markuu rabo inuu kililka wax ka daadsado khal khal galiya telefishinka, si loogu yeedho, isagoo markuu wixiisa qaatana ka hagaajiya cillada. Dhinaca kale waxaa wararkii ESTV ka bixi jiray ay badankood ka baxaan Universal oo lacag dheeraad ah ku qaata hawshaas.

This email address is being protected from spambots. You need JavaScript enabled to view it.

Madaxda Kililku Diridhabe Maxay Ka Doonaan?

Xogta Shacabka (Diridhabe) Waxaa baryahan danbe aad u soo badanaya booqashada ay madaxda kililku ku tagaan magaalada Diridhbe. Wariyaha Xogta shacabka oo maalmahanba halkaasi joogay ayaa soo sheegaya in ugu  yaraan ay Diridhabe ku suganyihiin 5 wasiir oo Kililka iyo agaasimayaal dhawr ah oo aysan jirin wax hawl ah oy u yimaadeen. Sidoo kale ayuu wariyuhu ku soo waramayaa inay Diridhabe joogaan xubno horay wasiiro uga ahaan jiray kililka.

Hadaba mar aan u kuur gallay ujeedada ka danbaysa safarkan masuuliyiinta ee Diridhabe ayaan ku soo ogaanay inay tahay laba arrimood. Waa ta hore ee masuuliyiintan oo lagu xanto inay si hoose u qabaan xaas ay dadka ka qarinayaan amaba loo yaqaano “qudba siro”, sidaasi darteed ay Diri dhabe u tagaan si ay reerkooda qarsoon wakhti ugu helaan.

Arrinta kale ee wariyaha Xogta Shacabku ku soo ogaaday baadhitaankiisa ayaa ah in Diridhabe ay ku yaallaan bangiyo lagu xasaysto lacagaha kililka laga soo dhaco. Marka ay masuuliyiintani halkaasi u tagaan sida ay maal qabeenada aduunku Switzerland u tagaan oo kale.

Maadaama aan ilaalinayno anshaxa saxaafada, waxaan door bidnay inaanaan soo daabicin magacyada masuuliyiinta uu wariyaha Xogta Shacabku ku arkay Diridhabe.

This email address is being protected from spambots. You need JavaScript enabled to view it.  

Wasiiro Heer Kilil oo Qunsulo Laga Dhigayo

Xogta Shacabka (Jigjiga) War goor dhawayd naga soo gaadhay magaalada Jigjiga ayaa sheegaya in siyaasiyiin miisaan culus ku leh kililka la go’aamiyay inay qunsulo noqdaan. Xogtan oo sida naloogu waramay suuqa ku jirtay in mudda ah ayaa hada la xaqiijinayaa in ragaasi ay boorsooyinkooda ka xidh xidhanayaan Jigjiga.

Ilo ku dha dhaw xarunta xisbiga SPDP oonu arrintan wax ka waydiinay ayaa noo xaqiijiyay jiritaankeeda iyo qaar kamid ah dadka la gudbiyay inay qunsulo noqdaan. Magacyada ilaa hada soo gaadhay Xogta Shacabka, waxaa kamid ah; M/weyne ku xigeenka C/fataax Macalin, Maayar ku xigeenka Diridhabe, Adan Faarax, Wasiirka Arrimaha Bulshada C/raxmaan Guray, Hogaan Ku xigeenka Nabadgalyada Maxamed C/Waaxid iyo La-taliyaha Madaxweynaha Abdisalan Top.

Ma cadda in magacyadu intan uun ku koobanyihiin iyo in dhamaan xubnahani wada noqonayaan qunsulo ama qaarkood loo magacaabi doono xilal kale oo dawlada Federaalka ah.

Isha ku hay Xogta Shacabka, wixii ka soo kordha amuurtan oonu ku raad taagannayhay faah-faahin dheeraad ah inaan ka helno.

This email address is being protected from spambots. You need JavaScript enabled to view it.

Enterprise-ka oo Agab Cusub Dhigay Guriga Martida ee Diridhabe

Xogta Shacabka (Diridhabe) Guriga martida ee ay Enterpris-ka Biyuhu ku leeyihiin magaalada Diridhabe ayaa lagu sameeyay dayac-tir, isla mar ahaantaana agaab cusub oo dibada katimd ay soo gaadhay. Wariyaha Xogta Shacabka oo wali ku sugan Diridhabe, ayaa nasoo gaadhsiiyay in ay Diridhabe yimaadeen saraakiil sare oo u shaqeeya Enterpriseka si ay qandaraaslihii hawshaasi loo xilsaaray ugala wareegaan.

Enterprise-ka Biyaha ayaa gobolka Shinniile ka wada mashaariic ay ku qodayaan in ka badan 40 ceel oo qayb ka ah barnaamujka MDG, waxaana Guest-House-kan la dayac tirayo loogu tala galay in la dajiyo Maareeyaha Enterprise-ka Ibraahin Cali marka uu halkaasi u tago inuu soo in dha indheeyo mashaariicda ka socota.

Wariyaha Xogta Shacabka oo saraakiisha Enterprise-ka wax ka waydiiyay agabka cusub ee loo keenay guriga martida, ayay u sheegeen inuu ka koobanyahey; lix qol oo jiif iyo saddex qol oo nasasho ama lagu qayilo. Inkastoo aanu wariyaheenu helin magaca ganacsadaha hawshan qandaraaska ku qaatay, hadana waxay u sheegeen in ay ku baxday laba milyan iyo badh Birr.

Enterprise-ka ayaa sidoo kale waxay guryo marti ku leeyihiin magaalada Jigjiga iyo Goday oo ay dayac tir ku samaynayaan Biyo-xidheenka galbeedka Godey.

This email address is being protected from spambots. You need JavaScript enabled to view it.

Uhuru Kenyata oo Yareeyay Tirada Wasaaradaha Dalka Kenya

Xogta Shacabka (Nairobi) Madaxweynaha dalka kenya Uhuru Kenyatta ayaa  shaaca ka qaaday qaab dhismeedka dowladda uu soo dhisi doono maalmaha soo aadan. Bayaan ka so baxay aqalka madaxtooyada Kenya ayaa lagu sheegay in tirada wasiirada oo horay u ahaan jirtay 44 iminka la yareyay oo laga dhigay 18 wasaaradood.

Sida ku xusneed bayaanka aqalka madaxtooyada shaxda wasiirada cusub ayaa lo samayay sida tan.

 1 wasaarada arimaha gudaha iyo isku dubaridka Howlaha dowladda.

 2 wasaarada Qorshaynta.

 3 Wasaaradda gaashan dhiga

 4 wasaaradda Caafimaadka

 5 wasaaradda waxbarsahada iyo Tiknooliyadada casriga ah

 6 wasarada kayd haynta Qaranka

 7 wasaaradda gaadiidka iyo kaabayaasha dhaqaalaha

 8 wasaaradda Degaanka,Biyaha iyo Qayraadka dabiiciga ah

 9 wasaaradada dhulka, guryanta iyo hormarinta Magaalooyinka

 10 wsaaradda warfaafinta ,warisgaarsiinta iyo tiknooliyadda casriga ah.

 11 wasaaradda tamarta iyo batroolka

 12 wasaarada beeraha ,xanaanada xoolaha iyo kaluumaysiga

 13 wasaaradda warshadaha iyo hormarinta ganacsiga

 14 wasaarada ganasiga iyo dalxiiska.

 15 wasaaradada macdanta

 16 wasaaradada ciyaaraha iyo dhaqanka.

 17 wasaarada dhaqaalaha .

 

Waa qaab dhismeedka dowlada cusub ee uu soo dhisi doono madaxweyne Uhuru kenyatta oo shalay  shaaca laga qaaday.

This email address is being protected from spambots. You need JavaScript enabled to view it.

C/laahi Ethiopia oo Jago Cusub Loo Magacaabay

Xogta Shacabka (Jigjiga) Madaxweyne Ku xigeenka Kililka, Cabdulaahi Ethiopia oo isagu meel uu kala dhigo la’aa awoodo siyaasadeed ayaa todobaadkan loogu kordhiyay mid cusub. Sida ay qortay shabakada Cakaaranews ee ku hadasha afka xukuumada Cabdi Iley, waxaa ciwaanka C/laahi Ethiopia laga hor mariyay (Immediate Vice-President), taasoo ay dadka siyaasada qaadaa dhiga ku macneeyeen inuu C/laahi labada M/weyne ku xigeen ee kale, isyaano ka leeyahy, oo marka M/weynuhu maqanyahey isagu noqonayo ku simaha M/weynaha.

C/laahi Ethiopia ayaa horay u ahaa M/weyne ku xigeen, Xoghayaha Xisbiga SPDP, Hogaanka Nabadgalyada DDS, Gudoomiyaha Guddiga Qandaraaska Kililka & Xildhibaan ka tirsan Baarlamaan Dagaanka Soomaalida. Jagadan cusub ee C/laahi Ethiopia u soo korodhay ayaad moodaa inay cadaynayso in Cabdi Iley  ka soo dhawaysanayo ku xigeennada kale.

Kililada kale ee M/weyne ku xigeeno dhawr ah leh ayaa dastuurkooda ku qeexa ku xigeenka dastuuriga ah, balse kililka Soomaalida way darajo simanyihiin, inkastoo C/laahi yahay kan kaliya ee xildhibaan ka ah. C/xakiin Cigaal iyo C/fataxaa Maxamuud Xasan ayaan kamid ahayn baarlamaanka heer deegaan, waxaabana ka awood badan dhanka siyaasada Wasiirka Madaxtooyada C/Casiis iyo Madaxa Xarunta Xisbiga Axmad Shukri oo labaduba xubno ka ah Guddiga Fulinta SPDP.

Xidhiidhka C/laahi Ethiopia iyo Cabdi Iley ayaa ka soo bilawda afar sano ka hor markii C/laahi loo magacaabay ku xigeenka Hogaanka Nabadgalyada oo u Cabdi Iley ku xigeen u ahaa, taasoo ay wada shaqaynta wakhtigaasi dheer keentay awoodaha faraha badan ee la siiyay. M/weyne ku xigeenka ayay dadku waayadan danbe ugu yeedhayeen Khaadimul-xaramayn, hadana waxaa loo raacin doonaa ahna dhaxal sugaha,mar hadii ku xigeenadii kale baar la dheeraysiiyay.

This email address is being protected from spambots. You need JavaScript enabled to view it.

Videos



Xogtashacabka Radio

Follow us